Բաղադրատոմսեր / Խոհանոց recepts.do.am

ԿԱՐՏՈՖԻԼՈՎ ՄԻՍ ԳԻՆՈՒ ՄԵՋ

Joker — Wed, 17 Apr 2013 16:11:38 GMT

Բաղադրիչներ.
տավարի փափկամիս – 400 գ,
խաշած կարտոֆիլ – 750 գ,
սոխ – 3 գլուխ,
մարինացված վարունգ – 3 հատ,
կտրատած կանաչ սոխ – 1 ճ. գդ.,
թթվասեր – 150 գ,
կարագ – 50 գ,
սպիտակ գինի – 0,125 լ,
տոմատի մածուկ – 1 թ. գդ.,
մանանեխ – 1 թ. գդ.,
սպիտակ աղացած պղպեղ,
քերած մշկընկույզ,
աղ
Տապակը յուղել, շարել կտրատած կարտոֆիլի շերտերը, վրան շաղ տալ մանրացված սոխ: Ավելացնել գինի, աղ, պղպեղ ցանել, կարագ դնել, ծածկել և եփել մոտ 12 րոպե: Տավարի մսի թաղանթը հեռացնել, բարակ շերտատել: Կաթսայի մեջ կարագ հալեցնել, մնացած սոխը տապակել: Ավելացնել միսը, թթվասերը տոմատի մածուկը, մանանեխը, կափարիչը փակել և եփել հինգ րոպե: Համեմել աղով, պղպեղով, կանաչ սոխով, ավելացնել կտրատած վարունգը, մշկընկույզը: Եփել, մինչև միսը պատրաստ լինի: Միսն ու կարտոֆիլը մատուցել միասին:

ԳԱՌԱՆ ՓԱՓԿԱՄԻՍ ՆՈՒՇՈՎ

Joker — Wed, 17 Apr 2013 16:05:52 GMT

Բաղադրիչներ.

գառան միս – 800 գ,
նուշ – 50 գ,
սխտոր – 2 պճեղ,
սոխ – 2 գլուխ,
կարագ – 50 գ,
բանջարեղենի հյութ – 0,125 լ,
մսի արգանակ – 0,125 լ,
սերուցք – 0,125 լ,
քաղցր մանանեխ – 1 թ. գդ.,
թարմ անանուխ – 4 ճյուղ,
մաղադանոս – 0,5 փունջ,
սպիտակ աղացած պղպեղ, աղ
Մսից հեռացնել ճարպի շերտը: Սխտորը կտրատել, տրորել խյուսի աստիճան: Նուշն ու մաղադանոսը մանր կտրատել: Մսին քսել մանանեխ, սխտորի խյուս, նուշ ու մաղադանոս շաղ տալ վրան: Ռուլետի պես փաթաթել, թելով կապել, աղ, պղպեղ ցանել: Կաթսայի մեջ կարագ հալեցնել, կտրատած սոխը կարագով տապակել, հետո դնել միսը: Տապակել մոտ հինգ րոպե, շուռ տալ, տապակել ևս 25 րոպե: Միսը դնել ափսեի մեջ, ծածկել և թողնել տասը րոպե: Հյութն ու արգանակը խառնել սերուցքին, եփել հինգ րոպե: Աղ, պղպեղ ավելացնել, կտրատած անանուխ լցնել: Փափկամիսը կտրել, մատուցել խավարտի հետ:

ՍԽՏՈՐՈՎ ԽՈԶԻ ՄԻՍ

Joker — Wed, 17 Apr 2013 16:04:43 GMT

Բաղադրիչներ.
խոզի փափկամիս – 700 գ,
սխտոր – 5-6 պճեղ,
մանանեխ,
աղ, պղպեղ

Սխտորի պճեղները կտրատել 2-4 մասի: Խոզի մսի մեջ բացվածքներ կտրել, սխտորները մտցնել մեջը: Մսին աղ, պղպեղ, մանանեխ քսել: Փաթաթել փայլաթիթեղի մեջ: Դնել ջեռոցի տապակի մեջ, եփել 180 աստիճանում 1.5 ժամ: Մատուցել կտրատած:

ՏՆԱԿԱՆ ԱՊՈՒԽՏ

Joker — Wed, 17 Apr 2013 16:03:39 GMT

Բաղադրիչներ.

հավի միս – 600 գ,
սխտոր – 1 պճեղ,
ժելատին – 1 ճ. գդ.,
իտալական չոր կանաչիների փունջ – 1 թ. գդ.,
աղ, սև պղպեղ

Օգտագործվում են հավի ոչ միայն կրծքամիսը, այլև «մուգ» միսը: Ոչ խոշոր կտրատել, աղ, պղպեղ, կտրատած սխտոր, համեմունքներ և ժելատին: Լավ խառնել և թողնել 15-20 րոպե: Կտրել ջեռոցի համար նախատեսված թաղանթը, միսը լցնել մեջը, թելով կապել ծայրերը: Դնել մետաղյա բանկայի մեջ և եփել 190°С ջեռոցում մոտ մեկ ժամ: Բանկան դնել տապակի մեջ, որ առաջացած ավելորդ հեղուկը չթափվի: Եփվելուց հետո թողնել հովանա, դնել սառնարանի մեջ: Հաջորդ օրը հանել, ազատել թաղանթից: մատուցելիս կտրատել ոչ շատ բարակ:

ՏԱՎԱՐԻ ՄԻՍ ԲՈՒՐԳՈՒՆԴՅԱՆ

Joker — Wed, 17 Apr 2013 16:01:25 GMT

Բաղադրիչներ.

տավարի փափուկ միս – 1 կգ,
ապուխտ – 30-50 գ.,
2 միջին չափի գազար,
1 խոշոր սոխ,
2 պճեղ սխտոր,
կարմիր չոր գինի (եթե լինի բուրգունդյան, իդեալական կլինի, բայց կարելի է և մերը) – 450 մլ,
մսի կամ բանջարեղենի արգանակ կամ ջուր – 450 գ.,
ալյուր – 2 ճաշի գդալ,
տոմատի մածուկ – 2 թեյի գդալ,
յուղ կամ կարագ ( կարելի է վերցնել կեսը, կեսը բուսայուղ լցնել),
գառնի (համեմունքների) փունջ (3 մաղադանոսի ճյուղ, 3 ճյուղ ուրց, կես դափնու տերև),
հատիկ բուրավետ պղպեղ – 5-7 հատ,
շամպինիոն – 350-450 գ.,
մարգարտե սոխուկներ (կարելի է պարզապես մանր սոխեր կամ կանաչ սոխի գլխիկներ վերցնել) – 300 գ + 1 թեյի գդալ շաքարավազ+300 մլ ջուր + 30 գ. կարագ,
աղ,
աղացած պղպեղ,
մաղադանոս

Միսը լվանալ, չորացնել, ջլերը հեռացնել: Կտրատել խոշոր կտորներով, անձեռոցիկի վրա չորացնել: Ապուխտը ձողիկներով կտրատել:
Գազարը լվանալ, մաքրել, մանր կտրատել: Սոխը մաքրել, մանրացնել, սխտորը` նույնպես: Բանջարեղենը կարելի է մանրացնել դանակով, ավելի հեշտ կլինի` խոհանոցային կոմբայնի օգնությամբ: Գառնի (համեմունքների) փնջի համար վերցնել մաղադանոսի, ուրցի փնջերը, դափնու կես տերևը, որոնք նախապես հարկավոր է լվանալ և չորացնել, թելով կապել կամ դնել մաքուր տոպրակի մեջ: Խոր սոտեյնիկի կամ չուգունե թավայի մեջ լցնել մանրացրած ապուխտը, խառնելով տապակել մոտ հինգ րոպե: Բեկոնը թավայից հանել, դնել մի կողմ: Թավայի մեջ մեկ գդալ յուղ կամ կարագ ավելացնել, կրակն ուժեղացնել և տապակել միսը: Որպեսզի այն ոչ թե եփվի, այլ տապակվի, մսակտորները հերթով գցել թավայի մեջ, այլ ոչ միանգամից: Տապակել երկու կողմից մինչև կարմրի: Միսը դնել ապուխտի կողքին: Յուղն ավելացնել, տապակել գազարը, սոխն ու սխտորը, կրակն իջեցնել: Մի քանի րոպեից լցնել ալյուրը, տապակել: Խառնելով ավելացնել տոմատը, հետո նաև գինին: Ավելացնել արգանակը, կրակն ուժեղացնել, եռացնել մի քանի րոպե: Հետո կրակն իջեցնել, աղ անել, գցել պղպեղի հատիկները և համեմունքի տոպրակը: Ավելացնել միսն ու ապուխտը, եփել: Կափարիչը փակել, դնել 160 աստիճան տաք ջեռոցի մեջ 2,5-3 ժամով: Մեկ այլ թավայի մեջ լցնել 300 մլ ջուր, 30 գրամ կարագ, շաքարավազ, մաքրած մանր սոխուկները: Եռացնել, հետո կրակն իջեցնել, ծածկել կափարիչով, եփել ~10 րոպե: Կափարիչը վերցնել, թավան թափահարելով խառնել, մինչև հեղուկը գոլորշիանա, սոխը` կարմրի: Շամպինիոնները մաքրել, լվանալ, կտրատել, կարագով տապակել, աղ, պղպեղ անել: Ռագուն հանել ջեռոցից: Հանել համեմունքի տոպրակը, ավելացնել սունկն ու սոխուկները: Մատուցել կարտոֆիլի հետ` կանաչիով զարդարելով:

ԿԵՐՈՒՍՈՒՍ

Joker — Wed, 17 Apr 2013 16:00:41 GMT

Բաղադրիչներ.

ոչխարի միս – 450 գ,
սոխ – 2 գլուխ,
յուղ – 3 ճ. գդ.,
տոմատի մածուկ – 2 ճ. գդ.,
կարտոֆիլ – 4 հատ,
մաղադանոս – 1 փունջ,
սև պղպեղ – 1 պտղունց,
աղ

Միսը լվանալ, թաղանթները և ջլոտ մասերը հեռացնել, կտրատել, աղ, պղպեղ ցանել և առանց յուղի տապակել: Երբ միսը գրեթե պատրաստ լինի, յուղ ավելացնել և վրան լցնել երկար շերտատած կարտոֆիլը: Այն նախապես պետք է լվանալ սառը ջրով և սրբիչով չորացնել: Տապակել, անընդհատ խառնելով: Սոխը կտրատել, յուղով տապակել, տոմատի մածուկ ավելացնել, լցնել մսի և կարտոֆիլի վրա և տապակել ևս 2–3 րոպե: Մատուցելիս վրան շաղ տալ մանր կտրատած թարմ մաղադանոս:

_______________

ՄՈՍԿՈՎՅԱՆ ՊԵԼՄԵՆԻՆԵՐ

Joker — Wed, 17 Apr 2013 15:59:53 GMT

Բաղադրիչներ.

ալյուր – 700 գ,
ձու – 2 հատ,
ջուր – 260 գ,
տավարի միս – 350 գ,
խոզի միս – 350 գ,
սոխ – 100 գ,
կաթ կամ ջուր – 170 գ,
շաքարավազ – 2 գ,
աղ, պղպեղ

Ալյուրը մաղել, վրան փոս անել, փոսի մեջ կոտրել ձուն, գոլ ջուր, որին մի քիչ աղ է խառնված, և պինդ խմոր հունցել: Խոնավ սրբիչի մեջ փաթաթել խմորի գունդը և թողնել մնա 30–40 րոպե: Միջուկի մսից թաղանթներն ու ջլերն առանձնացնել, կտրատել: Մին ու սոխը երկու անգամ աղալ: Ավելացնել աղ, շաքարավազ, պղպեղ, մի քիչ ջուր կամ կաթ լցնել, լավ խառնել: Խմորը մասերի բաժանել, երշիկի ձև տալ, կտրատել: Ամեն կտորը բարակ բացել: Խմորի մեջտեղում դնել մի գդալ միջուկ, խմորի եզերերն ամրացնել, փակել: Խմորին կիսալուսնի ձև տալ կամ ծայրերը միացնել, կլորացնել. երկուս էլ թույլատրելի է: Կարելի է սառեցնել և պահել: Եփել աղաջրում, մինչև ջրի երես լողան պելմենիները: Ջրից հանել, մատուցել կարագով կամ թթվասերով:

ՄԻՋՈՒԿՈՎ ԽՈԶԻ ՄԻՍ

Joker — Wed, 17 Apr 2013 15:58:48 GMT

Բաղադրիչներ.
խոզի միս – 600 գ,
արքայախնձոր – մի քանի կտոր,
պանիր – 100 գ,
ձու,
պաքսիմատ,
աղ, բուսայուղ

Պանիրը քերել, արքայախնձորը կտրատել: Միսը բաժանել տափակ կտորների: Մսակտորի կեղքից բացվածք անել, կտրել ոչ մինչև վերջ: Բացված գրպանիկի մեջ լցնել մի քիչ քերած պանիր և արքայախնձորի շերտեր: Ձուն հարել, աղ անել: Մսի շերտերը թաթախել ձվի մեջ, հետո պաքսիմատի մեջ: Տապակել բուսայուղով, կարմրեցնել, հետո կափարիչը փակել և եփել մինչև միսը պատրաստ լինի: Մատուցել տաք վիճակում:

ԽՈԶԻ ՍԹԵՅՔ ԿՈՆՅԱԿԻ ԹԱՆՁՐԱՀՅՈՒԹՈՎ

Joker — Wed, 17 Apr 2013 15:57:04 GMT

Բաղադրիչներ.
խոզի սթեյք – 2 կտոր,
կիտրոն – 1 հատ,
մեղր – 1 ճ. գդ.,
կոնյակ – 50 գ,
սխտոր – 1 պճեղ,
կծու պղպեղ – 1 հատ,
բուսայուղ,
աղ

Միսը թեթևակի ծեծել, աղ ցանել: Վրան լցնել կիտրոնի հյութի ու մանրացրած սխտորի խառնուրդը: Մեկ ժամ թողնել, ապա տապակել միսը բուսայուղի մեջ: Մնացած մարինադը խառնել մեղրի, կոնյակի և կտրատած կծու պղպեղի հետ: Թանձրահյութը եռացնել, լցնել կաթսայի մեջ, ավելացնել տապակած միսը: Կաթսան դնել տաք ջեռոցը 20-25 րոպե: Մատուցել աղցանի հետ:

ՍՈՒՆԿՈՎ ՏԱՎԱՐԻ ՄԻՍԸ ԳԻՆՈՒ ՄԵՋ

Joker — Wed, 17 Apr 2013 15:55:20 GMT

Բաղադրիչներ.
տավարի միս – 500 գ,
սոխ – 2 գլուխ,
սունկ – 300 գ,
տոմատի մածուկ – 2-3 ճ. գդ.,
բուսայուղ – 2 ճ. գդ.,
կարմիր չոր գինի – 200 մլ,
շաքարավազ – 1 թ. գդ.,
աղ, պղպեղ,
չոր ծիթրոն, դափնու տերև

Տավարի միսը լվանալ, կտրատել: Թավայի մեջ բուսայուղ տաքացնել, միսը տապակել մի քանի րոպե: Երբ այն գույնը փոխի, և կեղև առաջանա, ավելացնել սունկը: Նախապես այն լցնել աղաջրի մեջ, ապա լվանալ հոսող ջրով: Եթե շատ խոշոր են, կտրատել: Սունկը մսի հետ տապակել 3-5 րոպե: Սոխը կիսել, շերտատել, լցնել թավայի մեջ: Տապակել այնքան, որ սոխը թափանցիկ դառնա: Ապա լցնել գինին, տոմատի մածուկը, համեմել, աղով, պղպեղով, շաքարավազ լցնել: Ավելացնել ծիթրոնի և դափնու տերևներ: Եռալուն պես դափնու տերևը հանել, որպեսզի այն մյուս բույրերի նկատմամբ գերիշխող չդառնա: Խառնել ևս մեկ անգամ, դնել շատ մարմանդ կրակին և եփել 1-2 ժամ: